SAN PABLO, Brasil – Polis Brasileño a recupera cerca di 1.5 miyon di dollar di e botin cu a wordo horta dialuna den e asalto miyonario “de pelicula” riba e compania di siguridad priva Spaño Prosegur, na Ciudad del Este (Paraguay), frontera cu Brasil.
E banda di asaltante, parce ta miembronan di un organisacion criminal Brasileño, a huy pa Brasil despues di e asalto y nan a bin ta obheto di un intensa operacion di buskeda cu a laga por lo menos 3 morto y 12 hende deteni.
Ademas di e armanan, municion, shete kilo di explosivo, truck, embarcacion y vestnan antibala, cu a wordo confisca di e asaltantenan na Brasil, Polis Federal Brasileño, a recupera den e operacionnan tres saco cu placa cual cantidad solamente a wordo divulga durante e anochi di diamars.
Segun e ultimo balance di Polis Federal, en total a wordo recupera:
. 1.275.030 dollar den biyete di e moneda Mericano.
. 219.450 real (mas of menos 70.645 dollar)
. 733.640.000 guarani (mas of menos 131.241,5 dollar)
. Total calcula: 1.476.916 dollar
Polis a indica cu tabata tin dificultad pa conta placa debi na ki gran parti tabata muha.
Aunke cu inicialmente a informa cu e asaltantenan a apodera di entre 20 y 40 miyon di dollar, Prosegur a aclarea diamars den un comunicado cu e botin “no ta supera ocho miyon di dollar”, di loke a wordo recupera na Brasil, ta ekivale cerca di un ⅕ parti di loke a wordo horta.
Den e operacionnan di persecucion na e asaltantenan, Polis Federal tambe a confisca 6 fusil, 2 barco, 7 vehiculo, “hopi municion” y varios vest antibala.
E miyonario robo a wordo atribui na e organisacion criminal Brasileño, Primer Comando Capital (PCC), un organisacion criminal dirigi for di e prizonnan den e estado di San Pablo y cu ta wordo considera e mayor grupo criminal di e pais.
E siguridad na e frontera a wordo reforsa for di dialuna pa e orden di e presidente Brasileño, Michel Temer, kende a determina un activo colaboracion cu autoridadnan Paraguayo. Durante e robo, caminda cu a participa rond di 50 miembro di PCC, fuertemente arma, e asaltantenan a mata un suboficial di e Grupo Especial de Operaciones y a herida otro polis y tres civil.
E atracadornan a uza cuater vehiculo, un di nan un truck pa transporta elementonan di apoyo (hende y explosivo) y prome cu nan a huy, nan a enfrenta Polis.
Fuente: http://www.infobae.com